عند أم ترتر!!

كان ياما كان فى سالف العصر والأوان ولا يحلى الكلام إلا بذكر النبي عليه الصلاة والسلام.
كان فى ست اسمها نفوسه كانت ساكنة فى حوارى كرموز فى اسكندرية، ومعروف عنها أنها لامؤاخذه ست لسانها طويل وسليطة اللسان زى الكرباج ومفتريه وفى فرش الملاية مالهاش مثيل ولا أى أى ولا زى زى، وماشيه على مبدأ فى الحارة: "الشرشوحه ست جيرانها" .

"أم ترتر" اللى هى الست نفوسه مخلفتش ولد اسمه ترتر لأ كان عندها ولدين اسم النبي حارسهم وصاينهم ( اسماعيل وابراهيم) وبنوته كيوت كده اسمها (نبويه)، وترتر ده اسم شهره لأنها كانت عايقه ورايقة وفايقه لروحها وبتلبس جلاليب ومنديل بترتر عشان كدا سموها أم ترتر، وجوزها المعلم علوان أبو اسماعيل "عربجى حنطور".

أم ترتر كانت ست بيت شاطرة ساكنه فى بيت دور واحد منه بيت وعربخانه يعنى بيت الحصان والعربيه بتاعة المعلم علوان، والبيوت اللى حواليها دورين وثلاته.

وكانت عامله فوق السطح مزرعة فراخ وبط وكلهم "برابر" خت بالك انته برابر مافيش ولا ديك ولا دكر بط، وسايباهم سارحين ع السطح يلاغو فى ديوك ودكورة بط الجيران وزى ما قالوا "ومن الحب ما قتل حتى فى الفراخ والبط" ديوك الجيران كانت تنط على سطح أم ترتر عشان تكسر الفراخ الديك اللى ينط أو دكر البط على سطح أم ترتر مفقود ياولدى مفقود، وعلى طول يبقى اجدع عشوة للمعلم علوان!! وكانت خبرة فى اخفاء اثر الديك من ريش وخلافه.

 واللى كان يضيع لها ديك وتسأل الجيران يردوا عليها بصوت واطى "عند أم ترتر ربنا يعوض عليكى" عشان أم ترتر لو سمعت تخلى فرده الشبشب اعلى منهم مش بقولكوا كانت مفتريه كانت ريا وسكينه الفراخ .

ومن هنا طلع المثل الشعبى "عند أم ترتر" يدل على أستحاله أنك تلاقى اللى بتدور عليه رغم أنك عارف ومتأكد مين اللى خده ...!!!!

قد يعجبك أيضاً